مخاصمني بقاله مده - شادية
مخاصمنى بقاله مده وف ليله الشوق نادانى
كلمته سمعت حسه وقفلت السكه تاني
اكمنه يا ناس واحشني وخصامه كمان حايشني
كلمته سمعت حسه وقفلت السكه تاني
باليل والدنيا ضلمه دورت نمرته
وسكت ما قلت كلمه وانا بسمع همسته
قال أيوه الو.. مين .. وانا بايدي اليمين
خدت السماعه ابوسها وقفلت السكه تاني
وفتحت الراديو مره على غنوه بتعجبه
سبت التليفون عليها وانا بقصد اغلبه
سمعها للنهايه وفرحت انه معايا
من غير ما هو يعرف وقفلت السكه تاني
اكمنه ياناس واحشني وخصامه كمان واحشني
كلمته سمعت حسه وقفلت السكة تااااني
وف مره جم صحابي خليتهم يطلبوه
وغمزت لهم بعيني يعني عني اسألوه
سألوه قام قال كلام مافيهوش سيرة الخصام
اطمن قلبي حبة وقفلنا السكة تاني
شايفين يا ناس عشانه انا دايما بعمل ايه
اطلبه واشمعنى هوه ما طلبش مره ليه
ياريت يطلب ويقفل يعمل زي ما بعمل
اعرف انه فاكرني لو قفل السكه تاني
اكمنه يا ناس واحشني وخصامه كمان حايشني
كلمته سمعت حسه وقفلت السكه تاني
كلمات: عبد الوهاب محمد
ألحان: محمد الموجى